СП 2018 | Македонија го забележа и четвртиот пораз во квалификациите за мундијалот во Русија, вечерва „Црвената фурија“ без многу мака славеше со убедливи 4-0 над „Црвено-жолтите“...



Шпанија влезе како голем фаворит во дуелот со Македонија и ја оправда таквата улога, нашите фудбалери забележаа уште еден пораз.

Натпреварот започна со голема шанса за Македонија, уште во 5. минута Дарко Велкоски биеше со глава од непосредна близина, но само во Давид де Геа.

Македонија ја имаше и втората голема шанса на мечот откако по еден корнер се обиде и Горан Пандев со глава но биеше за малку крај голот на Шпанија.

Потоа почнаа да се редат шанси за шпанската репрезентација, се обидоа Мората два пати и еднаш Силва, а откако не успеаа им помогна Велковски кој си постигна автогол за водство на Шпанија од 1-0.

Во второто полувреме Македонија тргна поофанзивно, а тоа им даде поголем простор на Шпанците за игра кои почнаа да го користат во 63. минута кога Витоло погоди за водство од 2-0.

Следуваше една убава шанса на Барди, вистинска бомба од далечина која Де Геа ја скрати со крајни напори.

Во финишот од мечот, погодија и Начо Монреал и Адуриз за на крајот убедлива победа на Шпанија од 4-0.

Македонија квалификациите ги продолжува во март кога му гостуваме на Лихтенштајн во натпревар за освојување на првите бодови.

Во нашата група се играа уште два меча, Италија победи во Лихтенштајн со 4-0, а Израел славеше во Албанија со 3-0.

Извор: 24FUDBAL.com.mk