Македонија | Селекторот Игор Ангеловски го објави списокот за квалификацискиот дуел против Шпанија, а на него се најдоа и седум играчи од младинската селекција која обезбеди пласман на Европското првенство...
Селекторот Игор Ангеловски вети дека ќе го освежи тимот со млади фудбалери, тоа и се случи. На списокот за дуелот со Шпанија се најдоа седумина од младата селекција. Голманот Игор Алексовски, дефанзивците Ѓоко Зајков и Дарко Велковски, играчите од средниот ред Давид Бабунски, Енис Барди и Бобан Николов, како и напаѓачот Кире Марковски.
„Тоа што како стручен штаб го најавивме кога ни беше укажана довербата да ја предводиме А селекцијата на Македонија започнуваме да го реализираме. На почетокот од нашата работа поставивме три важни цели. Да создадеме тим кој ќе биде спој на искуство и младост, да се обидеме таа екипа да функционира и квалитетно да се спротиставува на секој противник и да бележиме подобри резултати во однос на претходните квалификации. Првите две главни цели мислам дека сме на добар пат да ги оствариме, а до крајот од циклусот ќе сториме сѐ да го подобриме пласманот и рејтингот на македонскиот фудбал. Фудбалерите кои се повикани од младата репрезентација го заслужија повикот, со пласманот на Европското првенство остварија историски резлутат и самите се наметнаа во најдобрата репрезентација, а не само затоа што јас ветив дека ќе им дадам шанса или затоа што јавноста тоа го бара“ - изјави Ангеловски.
„Треба да имаме трпение, очекувам амбициозна Македонија, но не треба еуфорично да го прифаќеме фактот што сега во тимот имаме неколкумина од младата репрезентација. Мора да бидеме внимателни, да ги користиме на позиции каде што е најнеопходно и постепено да го дополнуваме квалитетот на сето она што досега го одигравме во квалификациите“.
Македонија и гостува на Шпанија на 12. ноември, дуелот се игра со почеток од 20:45 часот.
Списокот на повикани фудбалери за дуелот со Шпанија:
Извор: 24FUDBAL.com.mk
