Јужна Америка | Неверојатни сцени се случуваа во Кито, репрезентативецот на Еквадор, Енер Валенсија два пати успеа да и избега на полицијата и да куртули од затвор...
Фудбалерот на Вест Хем, кој оваа сезона е на позајмица во Евертон, се најде во проблеми со властите во родниот Еквадор бидејќи не плаќал алиментација за својата ќерка.
Поради ненадмирените обврски бил издаден налог за негово апсење, но сепак тој куртули затвор откако полицијата имаше два неуспешни обиди да го приведе.
Полицијата најпрво се обидела да го приведе напаѓачот кога тој со делегацијата на Еквадор пристигнал на Стадионот Олимпико Атахуалпа за дуелот со Чиле.
Сепак, соиграчите пришле на помош и го спасиле Енер Валенсија.
Но полицијата не се откажала од намерата, па безбедносните сили го чекаа играчот долу покрај теренот за да го приведат по крајот на натпреварот.
Сепак, Енер Валенсија одново им избега откако одглуми повреда и на носилки го напушти теренот.
На стадионот сите беа сведоци на комични сцени, Енер Валенсија го носеа кон амболантното возило а полицијата трчаше по играчот на атлетската патека.
Во меѓувреме, адвокатите на Енер Валенсија издејствуваа поништување на налогот, па играчот ќе може да се фокусира на следниот натпревар а не на тоа како да и бега на полицијата.
Извор: 24FUDBAL.com.mk
