Македонија | „Црвено-жолтите“ со големи три бода се враќаат од Единбург, со голот на Кире Маркоски Македонија славеше со минимални 1-0...



Репрезентацијата на Македонија до 21 година го продолжува сонот за настап на Европското првенство.

Вечерва, избраниците на Благоја Милевски одиграа уште една извонредна партија, и со храбра и пожртвувана игра славеа против Шкотска со минимални 1-0.

Кире Маркоски беше стрелец на погодокот вреден големи три бода.

Фудбалерот на Работнички во 18. минута ја затресе мрежата на Шкотска по една одлична акција во која учествуваа Бобан Николов и Марјан Радески.

Голема заслуга за победата има и голманот Игор Алексовски, кој кон финишот на првиот дел со неколку одлични интервенции во серија спречи домаќините да дојдат до изедначување, а беше на висината на задачата и во продолжението од средбата.

Тој во завршницата од натпреварот исто така стисна заби и со повреда го доигра мечот откако беа направени сите три измени.

Македонија исто така од 69. минута играше и со играч помалку, откако Бејтулаи за две минути заработи два жолти картони.

Во судиското продолжение се случуваше вистинска драма. Шкотска најпрво постигна гол кој беше поништен, а потоа судијата покажа на белата точка за домаќините но по препорака на неговиот помошник оправдано ја промени одлуката и покажа топка за Македонија.

По победата во Шкотска, Македонија е на делба на првото место со Исланд со по 15 бода, но „Црвено-жолтите“ имаат и натпревар повеќе. Франција по киксот и поразот на гостувањето кај Украина има 14 бода на третото место.

Извор: 24FUDBAL.com.mk