МЕНИ

Македонија | Несфатливо е зошто УЕФА му наредила на Работнички да игра во горештината од 18 часот наместо во нормален вечерен термин...

Првиот македонски клуб кој ќе ја отвори европската авантура летово е Работнички. „Херојот“ од Дебар Маало во вторник на „Филип II“ ќе го нагости црногорскиот претставник Будуќност во првото квалификациско коло од Лига Европа.

Проблемот тука е во терминот за одигрување на натпреварот. УЕФА му наредила на Работнички да игра од 18.00 часот, верувале или не, за натпреварот да не се поклопува со два „дерби“ натпревара од првото квалификациско коло во Лигата на Шампионите. Имено, истиот ден од 20.00 часот силите ќе ги одмерат „гигантите“ Санта Колома (Андора) против Алашкерт (Ерменија) и Д Њу Сеинтс (Велс) против Тре Пене (Сан Марино).

Дека УЕФА кумувала на терминот потврди и самиот клуб преку својот веб сајт: „Работнички ќе го нагости црногорскиот претставник Будуќност на 28 јуни (вторник), со почеток од 18 часот. Насоката на УЕФА беше и терминот да не се поклопува со мечевите од квалификациите за ЛШ, што значи дека 18 часот е крајниот термин за почеток на овој меч. Реваншот ќе се игра на 7 јули (четврток)“, е изјавата на генералниот секретар Ненад Монев.

И сето тоа некако би го проголтале доколку немаше натпревари од Лигата на Шампионите и од 18 часот (Флора (Естонија) против Линколн од Гибралтар) и од 19 часот (Валета (Малта) против Бе36 од Фарски Острови)! Значи натпреварот на Работнички во секој случај ќе мора да се поклопи со некој друг натпревар. Оттаму, прашањето е зошто ако е веќе неизбежно поклопување, фудбалерите на Работнички и Будуќност да се мачат на горештината кога може да играат во далеку понормални вечерни услови?

Друго прашање кое ќе си го поставиме е зошто Работнички не смее да игра во вечерен термин, а таква привилегија добил ирскиот претставник Сент Патрикс? Како натпреварот на Ирците против Жонес Еш од Луксембург смее да се поклопува со вечерните „дербија“ од Лигата на Шампионите, а на Работнички не смее? Каде е тука логиката? Каде е правдата?

Очигледно УЕФА за некои е мајка, а за други маќеа. Очигледно УЕФА не ја интересира ниту фудбалот, ниту здравјето на фудбалерите, ниту публиката, туку само и е важно да го запише резултатот од натпреварот.

Филип Здравески