МЕНИ

ЕУРО 2016 | Како што е ред, домаќинот Франција го отвара Европското првенство, прв противник за главниот фаворит на континенталниот собир ќе биде селекцијата на Романија...

Денеска во 21 часот топката ќе започне да се „тркала“ низ стадионите во Франција, започнува Европското првенство во фудбал.

Првиот натпревар традиционално го игра домаќинот, а честа да биде на отварањето и припадна на селекцијата на Романија.

„За овој ден се подготвуваме две години. Нашиот последен официјален меч беше четвртфиналето против Германија на Светското првенство во 2014, во меѓувреме игравме само пријателски натпревари, па важно е што доаѓа стартот на Европското првенство. Местото е „Стад де Франс“, воведниот натпревар секогаш е нешто посебно. Тоа е меч кој може да ви ја даде насоката на целиот турнир“ - вели селекторот на Франција, Дидие Дешамп.

„Јасно е дека играме во Франција, но Романија е селекција против која не е лесно да се игра. Тие ќе дадат се од себе за добар резултат. Оваа селекција знае како да се брани, но им ги гледав повеќето последни натпревари па знам дека знаат и да нападнат. Доколку сакаат да победат ќе мора и да се отворат. Очекувам да излезат со намера да не изненадат, па мислам дека ќе гледаме интересна битка во сите 90 минути“.

Селекторот на Романија, Ангел Јорданеску верува дека воведниот натпревар е голема шанса за неговите фудбалери да покажат колку добар тим се.

„Овој натпревар го означува стартот на едно големо натпреварување помеѓу најдобрите селекции на континентот, стартот на Европското првенство. Играме против една од најдобрите репрезентации на турнирот, еден од главните фаворити. Се надевам и верувам дека моите фудбалери ќе го дадат најдоброто од себе за да им покажат на сите колку добар тим сме и колку вредиме. Целта е да ја поминеме групата и да оставиме добар впечаток на првенството“ - вели селекторот на Романија, Ангел Јорданеску.

Веројатни состави:

Франција: Лорис, Сања, Рами, Косчиелни, Евра, Канте, Погба, Матуиди, Гризман, Паје, Жиру

Романија: Татарушану, Сапураги, Кирикеш, Григоре, Рат, Хобан, Пинтили, Попа, Станчиу, Станчу, Кешеру