МЕНИ

Англија | Најавите се остварија, Илкај Гундоган и официјално е нов фудбалер на Манчестер Сити, тој е првото големо засилување за Пеп Гвардиола...

Манчестер Сити го потврди ангажманот на Гундоган од Борусија Дортмунд, се шпекулира дека трансферот изнесува околу 20 милиони фунти.

„Сити со задоволство може да соопшти дека потпиша со Илкај Гундоган. Германскиот репрезентативец дојде во Манчестер Сити од Борусија Дортмунд и потпиша четири годишен договор“ - стои во соопштението на клубот.

25-годишниот фудбалер е среќен што ќе настапува за Манчестер Сити.

„Пресреќен сум што потпишав за Манчестер Сити. Кога дознав за интересот од овој клуб со сето срце сакав да дојдам и работите се случија брзо“ - вели Гундоган.

„Ми беше убаво во Борусија Дортмунд, сакам да му се заблагодарам на клубот и на фановите за петте среќни години кои ги поминав таму“.

„Тие ми дадоа платформа за да играм и јас станав подобар фудбалер поради нивната верба и трпение кои ги покажаа кон мене“.

„Сега пред мене е нов предизвик, да освојам големи работи со Сити. Можноста да работам со тренер како Пеп Гвардила е навистина нешто важно. Поласкан сум што сум прво засилување на клубот ова лето. Можам да им ветам на фановите на Сити дека ќе дадам се за да ги освоиме титулите и во Англија и во Лигата на шампионите“.

„Најдобрите години се пред мене и мислам дека заедно можеме да освоиме големи работи. Не можам да дочекам да почнам да играм“.

Поради операција на коленото Гундоган го пропушта Европското првенство, а ќе го пропушти и стартот на Премиерлигата.