МЕНИ

Македонија | Новиот претседател на ФИФА, Џани Инфантино потврди дека постојат реални шанси бројот на учесници на Светските првенства да биде зголемен на 40 репрезентација уште од 2026 година...

Уште во изборната трка Џани Инфантино вети дека ќе го зголеми бројот на учесници на Светските првенства од 32 на 40, новиот претседател на ФИФА сега и конкретно се зафати за реализација на неговото ветување.

„Мораме да ги отвориме завршните турнири за повеќе репрезентации. Идејата е веќе од 2026 година тоа да се случи. За ова разговараме со сите. Потребно ни е што повеќе земји да сонуваат за учество на Мундијалот“ - изјави Инфантино.

Со зголемувањето на бројот на учесници на Светското првенство се зголемуваат шансите и на сите репрезентации за пласман на него.

Но, додека сите напредуваат македонската фудбалска репрезентација во изминатите години полека но сигурно потона до рангот на селекции како Сан Марино, Андора, Лихтенштајн, Фарски Острови, Малта...

Европското првенство од оваа година за прв пат ќе се игра со 24 репрезентации, одлуката за проширување на континенталната смотра влеа надеж и во македонската јавност, но наместо да направиме исчекор напред ние одигравме очајни квалификации.

Албанија, Исланд, Велс, Северна Ирска го најдоа патот до Франција, а ние не тапкаме ниту во место, туку се враќаме назад, некаде каде што и не сме биле порано.

Последните порази од Словенија и Бугарија само потврдија дека формата на сениорската репрезентација не се подобрува, со некој повремен блесок не се станува сериозен тим, потребен е континуитет на добри игри, нешто што во моментов изгледа апстрактно за Македонија.

Со ваквата форма Светското првенство да се зголеми и на 100 репрезентации место за Македонија ќе нема. Светлина во нашиот тмурен фудбал и надеж за подобри денови носат младинците кои имаат одлични настапи во квалификациите за ЕП, но дали тоа во иднина ќе влијае и на сениорскиот тим, останува да видиме.