МЕНИ

Македонија | Еден повик минатиот октомври беше доволен за играчот да добие надеж дека ќе игра за „подобрата“ репрезентација, за сега да остане со празни раце...

Дејан Трајковски, уште еден играч од дијаспората кој сакаше да седи на два стола остана на ничија земја. По Бенџамин Кантаровски кој ја одби Македонија за да игра за неговата родна Австралија која и натаму нема намера да го повика, сега во истата ситуација се најде и Дејан Трајковски.

23-годишниот лев бек на Домжале кој порано беше стандарден во репрезентацијата на Словенија до 21 година, лани имаше желба да игра за Македонија. Дури и својот фејсбук профил го преплавуваше со слики од него на главниот плоштад во Скопје, сликан со Александар Македонски.

Одеднаш таа желба исчезна. Причината е што Словенците тактички одлично си поиграа со него. Го викнаа во репрезентацијата минатиот oктомври за пријателската со Литванија и квалификацискиот натпревар со Сан Марино на кои за чудо не му дадоа шанса да игра. Не беше проблем и да играше на пријателската, но доколку и само една секунда одиграше на тој квалификациски со Сан Марино, ќе беше отпишан за Македонија. Такви се правилата на ФИФА.

Потоа за баражот со Украина во ноември воопшто не доби повик. Нормално, бидејќи не им треба. Но, работата беше веќе завршена, му дадоа лажна надеж. Сега за овие мартовски пријателски Словенија игра токму против Македонија. Сречко Катанец прв го објави списокот и Трајковски повторно го нема. Треба ли подобро објаснување дека едноставно не сметаат на него кога не го викаат на подготвителни натпревари на дури пет месеци пред нивните главни натпревари? Словенија, како и ние, се подготвува за мундијалските квалификации кои почнуваат во септември.

Игор Ангеловски беше во Словенија, разговараше со него, но доби одговор дека Словенија му е прв избор. А прв избор му стана откако го излажаа со повикот за да седи на клупа против Сан Марино. И така сега Трајковски нема да игра за ниту една репрезентација, затоа што Словенија си има подобри играчи на неговата позиција, а Македонија нема намера да биде резервна опција.