Италија Стратегот на Интер, Жозе Мурињо вели дека по крајот на сезоната ќе види каква е неговата иднина и потврди дека има клаузула во договорот со која може да си ја купи слободата

’Специјалниот’ никогаш не ја криел својата желба да се врати во Премиер Лигата исто како и да предводи тим од Шпанија со кој ќе може да ја освои Ла Лига.

Токму поради тоа Португалецот често е мета на шпекулации кои го поврзуваат со заминување од Интер и покрај тоа што Мурињо има уште три години од својот договор со шампионот на Италија а претседателот на Нероаѕурите не помислува на прекин на соработката со Мурињо.

Но стратегот во својот договор со Интер има и клаузула која му овозможува во било кое време да го раскине договорот и медиумите токму на тој факт ги темелат своите шпекулации кои го поврзуваат Мурињо со заминување од Серија А.

Во интервју за The Sun, Жозе потврди дека има со клаузулата може да си ја купи слободата и додаде дека по крајот на сезоната ќе размисли за својата иднина.

“Мојата иднина се состои од давање на најдоброто се до крајот на сезоната, потоа ќе видиме.” – рече Мурињо.

“Мојот договор е едноставен. Имам уште три години, со клаузула која ми дозволува да заминам кога ќе посакам.”

Манчестер Сити, Ливерпул па дури и Манчестер Јунајтед во минатото се споменуваа како можни дестинации на Португалецот.

Покрај тоа во игра за ’Специјалниот’ е и Реал Мадрид, кој најверојатно по крајот на сезоната ќе му врачи отказ на Мануел Пелегрини.

Powered by: 24 FUDBAL.com.mk