МЕНИ

Англија | Директорот на Арсенал, Лорд Харис открива дека Арсен Венгер може да купи речиси кого сака, ’Топџиите’ имаат 200 милиони фунти во банка...

Менаџерот на Арсенал ова лето одново може да го одврзе ќесето, клубот од северен Лондон има доволно финансиски средства да излезе во пресрет на барањата на Французинот.

„Имавме недостиг на пари кога се преселивме на Емирати, но тоа повеќе не е така” – вели Лорд Харис во разговор со Daily Mail.

„Можеме да го купиме речиси било кој играч, освен оние неколку кои се недопирливи”.

„Имаме 200 милиони фунти во банка”.

„На Арсен Венгер можете да му кажете дека нема пари и тој да не биде загрижен, но исто така можете да му дадете 100 милиони фунти и тој да не ги потроши”.

„Ја има нашата поддршка да го сруши трансфер рекордот на клубот. Доколку сака некој играч, може да го добие. Освен Меси и Роналдо, може да го купи било кој друг играч”.

Арсен Венгер неодамна изјави дека е заинтересиран само за играчи од светска класа, и до овој момент Петр Чех е единственото ново име на Емирати.

Лорд Харис открива дека на листата со желби има и напаѓач, кој сака да се пресели во Арсенал, но преговорите со клубот не се едноставни.

„Добивме листа со играчи кои Венгер ги сака”.

„На листата има напаѓач, но нема да ви го откријам името”.

„Потребно е да го натерате другиот тим да прифати продажба, но мислам дека играчот сака да се пресели кај нас”.

„Во основа се работи за тоа дали другиот тим ќе најде суперѕвезда за да го замени него, бидејќи немаат потреба да продаваат”.

Медиумите подолго време го поврзуваат Арсенал со Карим Бензема од Реал Мадрид и Пјер Емерик Обамејанг од Борусија Дортмунд.