Македонија | Претседателот на ФФМ, Илчо Ѓорѓиоски смета дека организацијата на Суперкупот на Европа ќе биде голем импулс за развојот на фудбалот на нашата земја и одлична промоција за Македонија пред милионскиот аудиториум ширум светот...
УЕФА денеска и официјално потврди дека Скопје ќе биде домаќин на европскиот Суперкуп во 2017 година. Победниците на Лигата на шампионите и Лига Европа за сезоната 2016/2017 ќе се пресметаат на „Филип Втори" Арената, тоа ќе биде најголемиот фудбалски настан организиран во Македонија.
Претседателот на ФФМ, Илчо Ѓорѓиоски е свесен што значи организацијата на Суперкупот за нашата држава, но и каква одговорност носи таа.
„Скопје е првиот град во регионот кој добива организација на вакво престижно фудбалско натпреварување, што претставува голема чест, но и голема одговорност. Суперкупот е настан кој ќе биде голем импулс и мотивација за развој на фудбалот во нашата земја и секако во регионот, а воедно и одлична можност Македонија да се промовира и афирмира пред светската јавност" - вели претседателот на ФФМ, Илчо Ѓорѓиоски.
„Со добивањето доверба да бидеме домаќини на настанот кој го следат милиони луѓе ширум светот, нашата организација станува чувар на националниот идентитет и горди сме што УЕФА ја препозна нашата посветеност за фудбалот и подготвеноста да бидеме одлични организатори на големиот спортски настан, изјави Илчо Ѓорѓиоски, Претседател на Фудбалската федерација на Македонија".
„За нашата кандидатура имавме апсолутен консензус и максимална поддршка од градот Скопје, Владата и државните институции. Во нив успеавме да пронајдеме партнер кој сака да учествува во еден од најголемите настани во самостојна Македонија, настан кој ќе донесе бројни краткорочни и долгорочни користи за нашата земја, за економијата и нашиот фудбал".
Извор: 24FUDBAL.com.mk
