Лига на Шампиони | Навивачот на Јувентус, Николо Де Марки е на патување долго 1100 км за да го гледа својот омилен тим на мегдан со Барселона во финалето од Лигата на Шампионите...



Во пресрет на двомечот со Реал Мадрид во полу-финалето, ’Старата Дама’ ги запраша своите фанови што ќе направат доколку нивниот тим се избори за финале.
 
Еден фан одговорил дека ќе оди пешки од Торино до Берлин само за да го гледа својот омилен тим во финалето од најелитното европско натпреварување.
 
По триумфот над ’Кралевите’, шампионот на Италија го праша Никола Де Марки дали ќе остане достоен на зборот.
 
„Веќе е предоцна за одење пеш, зошто не земеш велосипед?” – гласеше пораката на социјалните мрежи.
 
Де Марки се сложи да го прифати предизвикот но под услов Јувентус да му обезбеди билет за натпреварот.
 
„Доколку ми дадете билет, тргнувам утре” – беше одговорот на фанот.
 
Јуве одговори позитивно, го организираше патувањето, и во четвртокот Де Марки ја започна својата авантура долга 1100 км.
 
Тој преку Алпите, Швајцарија, Лихтенштајн и Германија треба да пристигне во Берлин на 4. јуни.

Извор: 24FUDBAL.com.mk