Лига на Шампиони | Тренерот на Реал Мадрид, Карло Анчелоти вели дека храбриот пристап може да биде клучен за пласман во финале од Лигата на Шампионите па вети дека ’Кралевите’ ќе го нападнат Јувентус...
Актуелниот шампион на Европа вечерва гостува во Торино во првиот натпревар од полу-финалето во Лигата на Шампионите.
Реал Мадрид е фаворит, но ’Старата Дама’ е силен противник на домашен терен и Карло Анчелоти тоа добро го знае.
„Не е лесно да се победи тука, Јувентус секогаш имал добри, конкурентни тимови” – рече тренерот на ’Кралевите’ на прес конференцијата.
„Затоа Реал Мадрид нема многу победи во Торино. Но ние имаме сон, да играме ново финле и две години по ред да ја освоиме Лигата на Шампионите”.
За дуелот, Анчелоти рече: „Двата тима се одлични, па оној што ќе го наметне својот квалитет ќе се пласира во финалето”.
„Во овој дел од натпреварувањето не е важно колку сте силни. Во полу-финале од Лигата на Шампионите ако сте исплашени ќе изгубите, ако сте храбри ќе победите”.
„Ќе одиграме офанзивно, ќе нападнеме, но во исто време ќе мораме да се браниме добро”.
„Во моментов сме во добра форма. Имавме проблеми во јануари и февруари, но играчите сега имаат голема самодоверба”.
Герет Бејл се опорави од повредата и одново е во комбинација за настап. Медиумите шпекулираат дека Велшанецот ќе биде стартер а Хавиер Ернандез ќе се пресели на клупата, но Карло Анчелоти не сакаше да говори за тоа со кои играчи ќе го започне утрешниот натпревар.
„Знам кој ќе биде стартниот состав, но нема да го обелоденам”.
Извор: 24FUDBAL.com.mk
