МЕНИ

Англија | Менаџерот на Челзи, Жозе Мурињо верува дека ’Топџиите’ одново можат да станат сила во Премиерлигата со ангажман на четворица играчи од светска класа...

По ремито помеѓу Арсенал и Челзи изминатиов викенд, легендата на ’Топџиите’, Тјери Анри истакна дека Арсен Венгер мора да ангажира четири квалитетни играчи за следната сезона да се бори за титулата.

Жозе Мурињо сега се надоврзува на ваквите коментари, и верува дека Арсенал со четири топ засилувања може одново да стане ’непобедлив’ и да го повтори успехот од сезоната 2003/04.

„Во моментов, многу е тешко тим во Премиерлигата да биде доминантен” – вели ’Специјалниот’.

„Ова не е Германија со Баерн. Ниту пак Швајцарија со Базел или пак Шкотска со Селтик”.

„Сега е многу потешко да бидете доминантни отколку во минатото. Како можеме да зборуваме за доминација кога сите знаеме што ќе се случи во летниот преоден рок?”

„Арсенал има феноменален состав. Тјери Анри рече дека им се потребни четири топ засилувања. Дајте му на Арсенал четворица играчи од светска класа и мислам дека одново ќе бидат ’непобедливи’”.

„Манчестер Јунајтед исто така има феноменален состав, го имаат најскапиот играч во историјата на Премиерлигата, а тој дури и не игра во последно време”.

„Тие се клуб кој не чувствува никакви последици од финансискиот фер плеј и летоска ќе инвестираат огромна сума на пари за засилување на составот”.

„Манчестер Сити освои две титули во три години и се говори дека одново ќе инвестираат силно”.

„Ливерпул со години се бори за титула. Па следната сезона ќе биде уште потешко”.