Англија | ФА одлучи да не покрене дисциплинска постапка против Бранислав Ивановиќ за инцидентот во кој беше инволвиран дефанзивецот на вчерашниот дуел против Евертон...



Во завршницата од средбата на Стемфорд Бриџ, Герет Бери стартуваше врз Еден Азар, играчите на Челзи побараа од судијата да покаже втор жолт картон и да го исклучи Англичанецот по што настана мешаница на теренот.
 
Најжесток во реакцијата беше Бранислав Ивановиќ, кој го зграпчи Џејмс МекКарти.


 
На прв потег изгледаше дека десниот бек на Челзи се труди да го одвои противничкиот играч, но од повторените снимки се доби впечаток дека Бранислав Ивановиќ сака да го удри или гризне Џејмс МекКарти.
 
Откако судијата не го санкционираше репрезентативецот на Србија, независен панел на ФА денеска го разгледа целиот случај.


 
Тројцата членови на панелот не можеле едногласно да утврдат дека потегот на Бранислав Ивановиќ заслужува црвен картон, па попладнево ФА соопшти дека против играчот нема да биде покрената дисциплинска постапка.
 
Во меѓувреме ФА реши да покрене постапка против Челзи и Евертон поради мешаницата што ја направија играчите на двата тима.

Извор: 24FUDBAL.com.mk