Англија | Сеск Фабрегас вели дека постоел контакт и доволно елементи за судијата да покаже на белата точка на вчерашниот дуел против Саутемптон, но додава дека секој може да има лош ден...



На пресметката помеѓу Саутемптон и Челзи на Сент Мерис, Сеск Фабрегас во второто полувреме доби жолт картон за симулирање откако при еден дуел со Мат Таргет падна во противничкиот шеснаесетник.
 
Дефанзивецот на ’Светците’ се лизна и го закачи Шпанецот, но судијата наместо да покаже на белата точка, му покажа картон на Сеск Фабрегас поради обид да одглуми пенал.
 
Жозе Мурињо беше бесен на ваквата одлука, ’Специјалниот’ на прес конференцијата по крајот на средбата упати огромни критики на адреса на арбитарот Ентони Тејлор и обвини дека се води кампања против Челзи.
 
Сеск Фабрегас исто така изрази разочараност од одлуката на судијата, но беше поблаг во критиките и истакна дека секој може да има лош ден.
 
„Дефинитивно имаше контакт” – вели Шпанецот. „Мислам дека судијата не беше на потребното ниво, но сите сме само луѓе и секој може да има лош ден”.
 
„Доколку во продолжението од сезоната играме како што игравме во второто полувреме против Саутемптон, ќе имаме многу среќни моменти, 100% сум сигурен во тоа”.
 
„Сакаме да играме така. Не го започнавме натпреварот добро, и можеби сега малку жалиме за тоа, но импресиониран сум од одговорот по примениот гол”.

Извор: 24FUDBAL.com.mk