Останато | Првиот човек на УЕФА, Мишел Платини бара ФИФА да го објави целиот извештај на Мајкл Гарсија за наводната корупција при избор на домаќини за мундијалите во 2018 и 2022...



Минатата недела, светската куќа на фудбалот ги ослободи Русија и Катар од обвинувањата за корупција при изборот на домаќините за мундијалите во 2018 односно 2022.
 
Но тука не престана дебатата за корупција во ФИФА, откако веднаш по соопштението на светската куќа на фудбалот се огласи Мајкл Гарсија, човекот што две години ја водеше истрагата.

Тој беше незадоволен поради одлуката на ФИФА да не го објави неговиот извештај од преку 430 страници, и се пожали дека заклучокот од 42 страни што го извадил судијата Ханс Јоаким Екерт содржи голем број на материјални грешки и непотполно и погрешно ги претставува фактите.
 
Неколку членки на УЕФА не се задоволни од ваквиот исход на настаните, веруваат дека единствен начин да се отстрани целиот сомнеж е да биде објавен целиот извештај, и побараа од ФИФА да го стори токму тоа.
 
Ваков е ставот и на првиот човек на европската куќа на фудбалот, Мишел Платини.
 
Првиот човек за односи со јавноста при УЕФА, Педро Пинто на Твитер поладнево напиша: „Претседателот Мишел Платини уште еднаш ја потврди својата поддршка за објавување на целосниот извештај на Гарсија доколку не бидат прекршени правилата за доверливост”.

Извор: 24FUDBAL.com.mk