МЕНИ

Англија | Арсен Венгер вели дека сеуште го обожава Сеск Фабреагс, менаџерот на Арсенал ги повика фановите топло да го пречекаат Шпанецот

Во пресрет на дуелот помеѓу Челзи и Арсенал, една од топ темите на прес конференцијата на Арсен Венгер беше Сеск Фабрегас.

Шпанецот, кој осум години го носеше дресот на ’Топџиите’, ова лето се врати во Лондон но потпиша за екипата на Челзи.

Арсенал имаше опција прв да стигне до услугите на Сеск Фабрегас но Арсен Венгер вели дека тие во составот имале доволно офанзивни фудбалери и затоа одлучиле да не го ангажираат репрезентативецот на ’Црвената Фурија’.

Запрашан дали враќање во Арсенал бил првиот избор на Сеск, Арсен Венгер одговори: „Секако, да”.

„Но кога тој замина го купивме Месут Озил. Го имаме Санти Казорла, Џек Вилшер, Арон Ремзи и Алекс Окслејд Чемберлен. Сите овие се офанзивни играчи”.

„Немаше потреба да купиме нов офанзивен фудбалер. Нашата одлука има смисла доколку го погледнете балансот на тимот. Мислам дека се работи за одлука која лесно се разбира”.

Французинот исто така вели дека сеуште го обожава Сеск Фабрегас, и ги повика фановите на Арсенал што ќе патуваат на Стемфорд Бриџ да му приредат топол пречек на нивниот поранешен капитен.

„Сеск ќе има одлична кариера бидејќи се работи за извонреден фудбалер” – додава Венгер.

„Кога ќе се пензионира и ќе погледне кон минатото, ќе види дека Арсенал и јас имавме позитивно влијание на неговата кариера. Никој не може да го оспори тоа”.

„Му посакувам се најдобро, тој е одличен играч. Не го мразам. Го обожавам како личност и фудбалер”.

„Кога не напушти, не напушти. Сите сме професионалци и мораме да го прифатиме тоа”.

„Мислам дека сите се слободни да одат онаму каде што сакаат. Мораме да ја почитуваме неговата одлука”.

„Ќе добие достоен пречек. Тука сите го почитуваат Сеск, и сакам да го добие пречекот што го заслужува”.