МЕНИ

Англија | Новото засилување на Манчестер Јунајтед, Радамел Фалкао цели кон освојување на титулата во Премиер лигата...

Репрезентативецот на Колумбија беше последното големо засилување за ’Црвените Ѓаволи’ ова лето, откако во завршните мигови од преодниот рок се пресели на Олд Трафорд на позајмица од Монако до крајот на сезоната.

Во разговор со Four Four Two, Радамел Фалкао вели дека е среќен што ќе игра во најдоброто првенство во светот и цели кон освојување на титулата во Премиер лигата.

„Целта е да постигнувам голови и да освојувам титули” – рече 28 годишниот напаѓач. „За оваа сезона, целта е да се освои првенството”.

„Премиер лигата е број 1 во светот. Најдобрите играчи се тука и секоја недела ги одмерувате силите против најдобрите”.

„Ова е важно за играч како мене, кој постојано сака да бележи прогрес, да постигнува повеќе погодоци и да освојува трофеи. Ова е одлична прилика за мене”.

Напаѓачот долго време се поврзуваше со Реал Мадрид, а во последните денови од летниот преоден рок, интерес пројавија и Манчестер Сити, Арсенал и Јувентус.

„Манчестер Јунајтед се обидуваше да ме ангажира неколку месеци”.

„Точно е дека и други клубови, како Реал Мадрид, пројавија интерес, но јас сакав да се преселам во Манчестер Јунајтед”.

„Се работи за голем клуб со одлична историја”.

„Имаше моменти кога мислев дека трансферот нема да се реализира на време, но на крајот се испадна добро”.

„Како што кажав, ова е одлична прилика за мене, особено по повредата”.