СП 2014 | Селекторот на Германија, Јоаким Лев сочувствува со Бразилците, потсетувајќи се на поразот од Италија во полуфиналето, вели дека треба еуфоријата да се смири и неговиот тим комплетно да се фокусира на финалето...
Германија и приреди неверојатен дебакл на бразилската селекција победувајќи ја на нејзин терен со фантастични 7-1.
Црн ден во историјата на Бразил кој никогаш нема да биде заборавен, овој натпревар ќе се памети вечно.
Јоаким Лев се труди да биде скромен во изјавите по натпреварот, тој вели дека многу добро знае како им е на Бразилците во овој момент иако работите ги споредува со натпревар кој не може да се спореди со она што се случи вчера.
„И ние бевме шокирани, го искусивме истото во 2006 година. Бразил беше шокиран, не го очекуваше тоа. И после натпреварот беше лесен за нас" - вели Лев.
„Во 2006 година ние имавме големи очекувања, голем е притисокот во вакви натпревари кога сте домаќин. Загубивме во 119 минута, па знаеме како сега се чувствува Сколари, како се чувствува целиот бразилски тим и сите луѓе во Бразил".
„Сите 200 милиони луѓе тука сакаат да одите во финале. Тоа е огромен притисок за фудбалерите, жал ми е за Сколари".
Лев е задоволен од својот тим, вели дека сега треба да се фокусираат само на финалето.
„Пет гола за 18 минути, јасно е дека тие беа шокирани и не знаеа што да прават".
„Ајде да го ставиме ова во контекст: домаќините не можеа да се справат со притисокот. Ние имавме чист, прецизен план на игра и знаевме дека ако се придржуваме до него и веруваме во нашата сила, ќе го добиеме натпреварот".
„Нормално, резултатот е неочекуван. Постигнавме три гола за четири минути, домаќинот беше шокиран, збунет, не можеа да се вратат на нивната првична замисла. Ние бевме опуштени, јасно ни беше во каква состојба се они, и го искористивме тоа".
„Секој наш играч многу добро си ја заврши својата работа со потполна концентрација. Но тоа треба да продолжи. Треба да останеме скромни. Не сакаме да го преувеличиме ова. Треба да останеме фокусирани до недела".
Извор: 24FUDBAL.com.mk
