МЕНИ

СП 2014 | Луис Фелипе Сколари е уверен дека и покрај отсуството на Нејмар, Бразил може да ја победи Германија и да се пласира во големото финале на светското првенство...

Вечерва на програмата е првото големо полуфинале на светското првенство, Бразил и Германија ќе се борат за влез на главниот натпревар.

Селекторот на Бразилците, Луис Фелипе Сколари се соочува со сериозни проблеми, поради повреда нема да може да смета на својот најдобар играч, Нејмар, а поради суспензија во составот ќе го нема и главниот дефанзивец, Тиаго Силва.

Но и покрај сите проблеми, Сколари верува дека има фудбалери кои можат да ја победат Германија и да ја остварат целта, пласман во финалето.

„Овој натпревар нема да го играме само за себе, ќе го играме за нашата земја, за се што некогаш сме сонувале, но исто така и за Нејмар и за се што направи тој за нас" - вели Сколари.

„Нејмар е еден од нашите клучни играчи и еден од најдобрите фудбалери во светот, но имаме уште 22 други кои се одбрани во селекцијата и знам дека сите тие се посебни".

„Ќе ни недостасува Нејмар но имаме тим кој може да ги надмине тешкотиите и да не однесе во финалето".

„Тоа е целта на групата уште од самиот почеток, да се квалификуваме во финалето".

„Ја следевме и играта на Германија, имавме скаути на нивните два последни натпревари кои ни дадоа инструкции како можеме да ги победиме".

„Кога работите тимски, кога имате добар тим од асистенти, полесно можете да ги носите одлуките".

„Го знам стартниот состав, кога фудбалерите ќе истрчаат на теренот ќе видите кои сум ги одбрал. Сакам да им кажам на Бразилците дека го даваме најдоброто од себе, и го правиме она што е неопходно".

„Понекогаш играта не е многу убава за око, но одиме понатаму. Имаме уште еден чекор до финалето".