СП 2014 | Капитенот на Бразил, Тиаго Силва верува дека Хуан Зунига имал намера да го повреди Нејмар, и го опиша опасниот старт како кукавички...
Во завршните мигови од дуелот помеѓу Бразил и Колумбија во четврт-финалето, Зунига стартуваше несмасно и со колено го удри Нејмар во грбот.
Напаѓачот заработи скршеница на пршлен, повреда поради која мундијалот е завршен за него.
И покрај сериозната на повредата на Нејмар, ФИФА не покрена дисциплинска постапка против дефанзивецот на Колумбија бидејќи судијата го забележал целиот инцидент.
На вчерашната прес конференција, Тиаго Силва не сакаше да ја коментира одлуката на светската куќа на фудбалот, но капитенот на ’Кариоките’ упати силни критики на адреса на Зунига.
„ФИФА донесе одлука и мораме да ја почитуваме” – рече Силва.
„Но јас сум централен дефанзивец, сум имал многу дуели, и никогаш не сум стартувал со толку високо подигнато колено врз грбот на противнички играч”.
„Потегот на Зунига беше кукавички. Неговиот потег не беше нормален. Нема шанси да го подигнете коленото толку високо освен доколку не сакате да креирате одредена ситуација”.
„Ова е моето мислење за целата ситуација”.
Покрај повредениот Нејмар, поради суспензија, и Силва нема да може да им помогне на неговите соиграчи во дуелот со Германија.
„Се обидував да не правам прекршоци на средбата со Колумбија. Мислам дека дуелот со голманот беше единствениот фаул што го направив, па тешко ми е што нема да играм во полу-финалето”.
„Сепак, мојата мисија на светското првенство не е завршена. Верувам во силата на оваа група. Има играчи кои можат да ме заменат. Имам верба во тимот што ќе настапи”.
Запрашан што ќе биде одлучувачко за пласман во финалето, Силва вели: „Тимот кој ќе направи помалку грешки ќе оди понатаму”.
„Деталите се тие кои ќе бидат решавачки. Двете репрезентации имаат одлични играчи”.
„Сите сакаат да гледаат ваков натпревар, дерби на светскиот фудбал, глобално класико”.
Извор: 24FUDBAL.com.mk
