Англија | Агентот на Петр Чех вели дека ПСЖ и Монако пројавуваат интерес за услугите на неговиот клиент, но сеуште немаат информации дека Челзи сака да го продаде голманот...



32 годишниот репрезентативец на Чешка една деценија е прв голман на ’Сините’ но неговата иднина е ставена под знак прашалник со најавите за враќање на Тибо Куртоа на Стемфорд Бриџ.
 
По три сезони поминати на позајмица во Атлетико Мадрид, талентираниот Белгијанец на барање на Жозе Мурињо ова лето најверојатно ќе остане во Челзи и ќе го завземе местото помеѓу стативите.
 
Сепак, до овој момент ’Специјалниот’ го нема известено Петр Чех дека треба да си побара нов клуб.
 
„Ништо не е променето. Петр има уште две години од договорот со Челзи и сака да продолжи да го носи дресот на ’Сините’” – вели неговиот агент Виктор Колар во разговор со Aktualne.
 
„Мурињо му нема соопштено дека повеќе не смета на неговите услуги. Не сме добиле сигнали дека Петр е на продажба”.
 
„Доколку тој треба да замине, ќе разговараме со неколку клубови, но во овој момент Чех останува во Челзи”.
 
За голманот интерес пројавуваат ПСЖ и Монако, а доколку му биде кажано да пронајде нов клуб, агентот на Чех ќе стапи во контакт и со Реал Мадрид и Барселона.
 
„ПСЖ пројави интерес, а исто така имавме контакт со луѓе од ПСЖ”.
 
„Доколку Челзи сака да се ослободи од Петр ќе разговарам со Зубизарета (спортскиот директор на Барса) и со луѓе од Реал Мадрид”.
 
„Во предвид би го земале и Баерн Минхен, но тие го имаат Мануел Нојер”.

Извор: 24FUDBAL.com.mk