Англија | ’Црвените’ го комплетираа трансферот на Адам Лалана од Саутемптон, клубот од Енфилд во исто време потврди дека со Баер Леверкузен е постигната согласност за обесштетувањето на Емре Чан...
По Рики Ламберт, во Мерсисајд ова лето се сели уште еден фудбалер на Саутемптон.
Веднаш по крајот на сезоната, Ливерпул понуди 20 милиони фунти за услугите на Адам Лалана.
’Светците’ овој предлог го одбија експресно, но подоцна двата клуба успеаа да пронајдат заеднички јазик и да си подадат рака за зделка вредна околу 25 милиони фунти.
26 годишниот репрезентативец на Англија изминатиов викенд ги помина редовните лекарски прегледи, а денеска стави потпис на долгогодишен договор по што стигна официјална потврда за неговиот трансфер на Енфилд.
„Фудбалскиот клуб Ливерпул е задоволен што може да го соопшти трансферот на Адам Лалана од Саутемптон” – гласеше известувањето на ’Црвените’.
За преселбата на Енфилд, Лалана рече. „Возбуден сум од следното поглавје во мојата кариера, доаѓам во специјален клуб како Ливерпул. Со нетрпение чекам да започнам”.
„Се надевам дека за кратко време ќе се прилагодам и ќе го дадам најдоброто од мене. Се надевам дека ќе помогнам Ливерпул да стигне до трофеии, токму поради тоа се преселив тука”.
Ливерпул во исто време потврди дека со Баер Леверкузен начелно е постигнат договор за трансфер на Емре Чан.
Медиумите подолго време најавуваа дека ’Црвените’ ќе ја активираат откупната клаузула во договорот на играчот вредна околу 10 милиони евра.
Се очекува трансферот да биде комплетиран во следните 24 часа.
Извор: 24FUDBAL.com.mk
