МЕНИ

СП 2014 | Варела со гол во 95. минута ја спаси Португалија од елиминација уште вечерва, но откако одиграа само 2-2 против САД, шансите за прогрес се многу мали...

Португалија не успеа да ја совлада селекцијата на САД, во драматичен натпревар одигра нерешено 2-2.

САД во второто полувреме успеа комплетно да го сврти натпреварот, поведе со 2-1 и беше пред пласман во 1/8 финалето, но Варела постигна гол во последните моменти и расплетот во групата го остави за последното коло.

Стартот на натпреварот наговестуваше триумф на фаворитот, бидејќи Нани уште во 5. минута постигна гол за водство на Португалија од 1-0.

Португалија имаше уште неколку шанси за зголемување на водството но не успеа во тоа, најблиску беше при една можност на Нани кој ја погоди стативата, а одбиената топка дојде до Едер, неговиот удар маестрално го одбрани Хауард.

Како одминуваше натпреварот САД ја зголемуваше офанзивата, Бредли пропушти извонредна можност на почетокот од вториот дел, откако Коста од гол линијата го блокираше неговиот удар.

Но израмнувањето дојде во 64. минута кога Џонс со прекрасен удар од далечина погоди за 1-1, а во 81. Демпси реализираше за комплетен пресврт и водство на САД од 2-1.

Кога се чинеше дека овој натпревар е решен, одличен центаршут на Кристијано Роналдо во 95. минута, Варела погоди со глава за конечни 2-2.

Португалија избедна елиминација уште вечерва, но шансите за прогрес им се минимални.

Во последното коло Германија и САД доколку одиграат нерешено, тие како прва и втора репрезентација одат во 1/8 финале.

САД и да загуби од Германија, Португалија треба со висока разлика да ја победи Гана со цел да ја анулира негативната гол разлика создадена од првиот нивни натпревар на светското првенство.

По две одиграни кола во оваа група, први се Германија и САД со по четири бода, по еден бод имаат Гана и Португалија.