МЕНИ

СП 2014 | Селекторот на Бразил, Фелипе Сколари го нападна својот колега од таборот на Холандија, Луј ван Гал по коментарите дека распоредот на СП 2014 ги фаворизира ’Кариоките’...

Првите два натпревари ’Лалињата’ ги одиграа после средбите на Бразил, но последното коло од групата, Холандија го игра пред домаќинот на мундијалот.

Луј ван Гал го критикуваше ваквиот распоред, и посочи дека ФИФА со овој потег го фаворизира Бразил.

Стратегот верува дека ’Кариоките’ ќе можат да бираат со кого ќе играат во осмина-финалето со оглед на тоа дека вкрстуваат со групата на Холандија.

„На секој натпревар ФИФА има реклама за фер плеј” – рече Ван Гал на прес конференцијата. „ФИФА сега прави трикови, и тоа не е добро. Тоа не е фер плеј”.

„Ќе се фокусираме на победа против Чиле и мислам дека нема да бидеме под влијание на фактот што Бразил игра после нас”.

„Претпоставувам дека Бразил ќе си ја заврши спортската должност. Прашањето е што прави ФИФА со распоредот”.

На ваквите коментари Фелипе Сколари одговори: „Некои луѓе изразија гледиште дека ние ќе одбереме со кого ќе играме”.

„Ваквите коментари се глупави и злонамерни, повторувам глупави и злонамерни”.

„Потребно е да играме за да се квалификуваме, а не да го одбираме противникот. ФИФА ги одреди термините на натпреварите”.