МЕНИ

СП 2014 | Франција блескаше во Салвадор, Триколорите со прекрасна игра ја прегазија Швајцарија со 5-2, најдобар натпревар во досегашниот дел од светското првенство...

Импресивен старт на светското првенство за Франција, по победата од 3-0 над Хондурас, следуваше уште поубедливо издание на избраниците на Дешамп, победена е Швајцарија со 5-2.

Ова беше најдобрата партија на една репрезентација во досегашниот дел од првенството, швајцарската мрежа можеше да биде и уште пополна, но со неколку одлични интервенции, Бенаљо спаси поголем срам.

Натпреварот го отвори Жиру во 17. минута со погодок со глава, не помина ни една минута, а веќе беше 2-0, по една одлична акција Матуиди реализираше.

Во 32. минута Бензема имаше шанса од пенал, но голманот на Швајцарија одбрани, на одбиената топка налета Кабај кој од пет метри не успеа да ја протне топката во празната мрежа.

На пет минути до крајот, Валбуена зголеми на 3-0, а во вториот дел реализираа и Бензема и Сисоко за фантастични 5-0.

До крајот Швајцарија со убави погодоци на Џемаили и Џака успеа да го ублажи поразот.

Во самиот финиш Бензема постигна уште еден гол, но само секунда пред неговиот удар судијата Кујперс означи крај на натпреварот, иако имаше уште 20. секунди до крајот.

И покрај поразот Швајцарија е во добра позиција за пласман во 1/8 финалето, а Франција во последното коло треба да ја продолжи добрата форма со која импресионира на почетокот.