СП 2014 | Луис Суарез беше двоен стрелец во триумфот од 2-1 над ’Гордиот Албион’, победа со која Уругвај ги задржа шансите за прогрес во нок-аут фазата а Англија е на работ на елиминација...
Напаѓачот не беше целосно фит по повредата на коленото што ја заработи на подготовките за мундијалот, но и покрај тоа Луис Суарез вечерва се покажа како клучен за Уругвај и во два наврати се запиша во листата на стрелците.
Англичаните имаа неколку добри прилики за гол што не ги искористија, па можат да жалат за поразот, особено што вториот погодок на Уругвај дојде по нивна грешка.
Руни ја имаше првата шанса на натпреварот, напаѓачот изведе слободен удар од 25 метри и биеше сантиметри покрај голот.
Потоа следуваа два обиди на Уругвај, најпрво Родригез се закани, а потоа над голот биеше и Кавани.
По половина час игра Англија требаше да дојде во водство, но ударот на Руни со глава од два метри заврши само во пречката.
Казната за ваквото промашување стигна во 39. минута кога Кавани одлично му асистираше на Суарез, кој со глава го матираше Харт за предност од 1-0.
На стартот од вториот дел Уругвај можеше да стигне и до поубедлива предност, Кавани се најде осамен пред Харт, но биеше многу лошо и непрецизно.
Руни имаше нова прилика за гол во 54. минута, но од пет метри биеше само во Муслера.
Напаѓачот сепак не можеше да ја промаши шансата во 75. минута кога по асистенција на Глен Џонсон рутински ја смести топката во голот на Уругвај.
Сепак, на пет минути до крајот, Уругвај се врати во водство откако Џерард реагираше лошо при една долга топка, Луис Суарез ја искористи укажаната шанса и силно шутираше покрај Харт за ново водство од 2-1.
Избраниците на Хоџсон потоа нападнаа со сите сили, Харт дури истрча во противничкиот шеснаесетник при еден корнер, но резултатот остана непроменет.
Со овој пораз Англија е на прагот на елиминација и ја нема судбината во свои раце.
Извор: 24FUDBAL.com.mk
