МЕНИ

Македонскиот интернационалец, Горан Пандев денеска пред медиумите во Италија беше презентиран како првото големо засилување на Нероаѕурите во зимскиот трансфер период...

Иако Интер официјално го потврди трансферот на Пандев во понеделникот и македонскиот интернационалец веќе одигра 70 солидни минути на вчерашниот дуел со Киево, Нероаѕурите денеска ја имаа презентацијата на своето прво засилување во јануарскиот трансфер пазар.

“Навистина сум возбуден што се вратив назад и што го носам дресот на Интер.” – рече Пандев.

“Имав многу побогати понуди од странство но сакав да соработувам со Мурињо и да се вратам во Интер.”

“Му благодарам на Мурињо што ми даде шанса да играм веднаш. Беше остварување на сонот да настапам во дресот на Интер по пет месеци надвор од терените.”

“Во Верона го дадов максимумот и им благодарам на соиграчите кои ми помогнаа многу.”

Пандев во Лацио беше ’замрзнат’ откако одби да го продолжи договорот и побара да биде продаден во летниот трансфер период.

Но по судски пат напаѓачот успеа на 23 декември да го раскине договорот со Бјанкочелестите.

“Во Лацио поминав пет прекрасни години и се подобрив како човек и фудбалер. Сакам да му се заблагодарам на тој тим, но сега сум тука.“

“Во Лацио ми беше добро, имав уште една година од договорот и посакав да заминам. Потоа се случи она што сите го знаеме. Не играв само тренирав и сега сум среќен што се вратив во Интер.”

“Во Лацио добро се снајдов, пораснав како фудбалер, и сега сум подготвен да победувам тука.”

“Тука има многу силен тим и околина која многу добро ме пречека.”

За ангажманот на Пандев, Мурињо рече: “Пандев е офанзивен фудбалер кој може да одигра неколку улоги.“

“Тој порасна многу и го има потребниот квалитет и искуство.”

Трансфер консултантот Леле Ориали рече: “Сакам да му посакам на Горан добредојде.“

“Многу сум задоволен што тој е повторно со нас бидејќи го пуштивме да замине прерано. Исто така сум задоволен што тој не одбра нас иако имаше понуди од многу клубови ширум Европа.“