МЕНИ

Англија | Според медиумите од ’Островото’, Арсен Венгер наскоро ќе стави потпис на тригодишен договор, а на располагање ќе добие и трансфер буџет од 100 милиони фунти...

Откако ’Топџиите’ ставија крај на девет годишниот пост без трофеј по триумфот над Хал во саботата во ФА Купот, медиумите пренесуваат дека Арсен Венгер конечно ќе стави потпис на нов договор.

Французинот, кој е обврзан кон Арсенал до 30. јуни, подолго време е во преговори со лидерите на клубот за продолжување на соработката, и според неколку весници од ’Островото’ официјална потврда ќе пристигне во следните 48 часа.

Извештаите велат дека Арсен Венгер ќе добие тригодишен договор, и плата од 8 милиони фунти по сезона.

Исто така се говори дека стратегот ќе добие и голем буџет за засилување на составот ова лето, Французинот ќе има на располагање 100 милиони фунти.

Нов напаѓач и нов фудбалер од средината на теренот се трансфер желбите, а помеѓу приоритетите е и задржување на Бакари Сања и Лукаш Фабиански.

Карим Бензема од Реал Мадрид и Марио Манџукиќ од Баерн Минхен се топ целите за засилување на навалната линија, а како потенцијално засилување се споменува и Вилфред Бони од Свонси.

Ларс Бендер од Баер Леверкузен и Морган Шнајдерлин од Саутемптон се фудбалерите од средниот ред на кои скаутите на Арсенал добро внимаваа изминатиов период, Анхел Ди Мариа од Реал Мадрид подолго време се посочува како трансфер цел, а последно име на листата е Џејмс Милнер од Манчестер Сити.

Доколку Арсен Венгер не го убеди Бакари Сања да стави потпис на нов договор, Арсенал ќе ангажира и нов десен бек, а на листата со желби се Серж Орие од Тулуз, Калум Чемберс од Саутемптон и Мика Ричардс од Манчестер Сити.

По победата на Хал на Вембли, менаџерот на ’Топџиите’ рече: „Најпрво ќе треба да почекаме и да видиме каква ќе биде одлуката на Сања, истото важи и за Фабиански”.

„Потоа ќе треба да донесеме двајца или тројца фудбалери за засилување на составот, тоа е сигурно”.

„За жал, во моментов има голем број на клубови на трансфер пазарот кои се обидуваат да донесат нови играчи”.