МЕНИ

Италија | Македонскиот репрезентативец, Горан Пандев имаше одличен натпревар против Каљари, напаѓачот постигна гол а врз него беа направени и два пенали...

По поразот на Фиорентина во дуелот со Сасуоло, ’Наполитанците’ уште пред да го одиграат натпреварот со Каљари, математички го осигураа третото место кое им носи настап во квалификациите за Лигата на Шампионите.

Но и покрај тоа, избраниците на Рафа Бенитез одиграа офанзивно и сосема заслужено прокнижија нови три бода.

Резултатот беше отворен во 33. минута, преку удар од белата точка откако македонскиот репрезентативец Горан Пандев беше соборен во шеснаесетникот.

Сигурен реализатор на најстрогата казна беше Дрис Мертенс, кој со погодок го прослави својот 27. роденден.

Десет минути подоцна, Горан Пандев се запиша во листата на стрелците. Астори лошо расчисти едно додавање, Хосе Каљехон ја уфрли топката во срцето на петерецот, а Горан Пандев со лизгачки старт ја затресе мрежата на гостите за предност од 2-0.

Во 57. минута од натпреварот, Горан Пандев имаше нова шанса за погодок. Напаѓачот одлично се ослободи од Астори, се најде осамен пред противничкиот гол и се обиде да го помине голманот, но беше фаулиран.

Судијата покажа на белата точка и црвен картон за чуварот на мрежата на Каљари. Марек Хамшик го изведе пеналот, но неговиот удар заврши само во пречката.

Сепак, 60 секунди подоцна, Наполи одново ја затресе мрежата на Каљари, по еден брз против напад, во листата на стрелци се запиша Блерим Џемаили.

За тимот од ’Сардинија’ настапи и македонскиот репрезентативец, Агим Ибраими кој на теренот помина помалку од еден час и беше заменет поради црвениот картон што го заработи голманот Силвестри.