МЕНИ

Англија | Напаѓачот на Ливерпул, Луис Суарез е прогласен за Фудбалер на Годината во Премиер лигата во изборот на Асоцијацијата на Професионални фудбалери...

Контроверзниот Уругваец има одлична сезона, па не е изненадување што го доби ова признание од неговите колеги, и покрај тоа што во минатото често беше во центарот на вниманието поради причини кои не се поврзани со фудбалот.

Луис Суарез во 2011 беше обвинет дека на расна основа го навредил Патрис Евра, но тоа сега не влијаеше врз одлуката на левиот бек на Манчестер Јунајтед, кој својот глас го дал токму за напаѓачот на Ливерпул.

Ист бил и случајот со Бранислав Ивановиќ, кој кон финишот на минатата сезона беше инволвиран во инцидент со напаѓачот, во кој Луис Суарез го кризна десниот бек на Челзи.

Но 27 годишниот има извонредни бројки зад себе, 30 погодоци на 31 средба како и 12 асистенции.

Тој е еден од најзаслужните што во овој момент Ливерпул е на врвот на табелата, во сезона во која малкумина очекуваа дека ’Црвените’ ќе можат да се борат за титулата.

Па затоа Луис Суарез доби најмногу гласови, и дојде до наградата Фудбалер на Годината пред Еден Азар од Челзи и Јаја Туре од Манчестер Сити.

„Во Премиер лигата има голем број на одлични фудбалери, па огромна чест ми е што овие играчи дадоа признание за мојата работа долу на теренот” - рече Луис Суарез, кој исто така се најде и во тимот на годината.

„Секогаш го давам максимумот за мојот тим и убаво е што ја освоив оваа награда”.

„Голема заслуга имаат моите соиграчи и целиот персонал во Ливерпул, без нив немаше да стигнам до ова признание”.