Шпанија | ’Кралевите’ го забележаа вториот пораз за само три дена, Реал Мадрид киксна на гостувањето кај Севиља, па Атлетико Мадрид е новиот лидер на табелата по победата над Гранада...
Во неделата Реал Мадрид целеше кон победа над Барселона и креирање предност од седум бода со што практично ќе го отпише лутиот ривал од триката за титулата.
Но избраниците на Карло Анчелоти доживеаа пораз на ’Ел Класико’, а истото им се случи и вчера на гостувањето кај Севиља, па ’Кралевите’ сега се на третата позиција на табелата, и повеќе ја немаат судбината во свои раце.
Реал добро започна на Рамон Санчез Пижуан, поведе со голот на Кристијано Роналдо во 14. минута.
Сепак, пет минути подоцна, една грешка на Чаби Алонсо придонесе Севиља да развие брза контра, а Бака изедначи на 1-1.
До крајот на првиот дел, Реал имаше неколку добри шанси да се врати во предност, голманот Бето одбрани два обиди на Роналдо и еден на Бејл, а домаќините имаа и среќа кога CR7 ја погоди стативата.
Во второто полувреме, гостите не беа толку опасни, Севиља лесно се справуваше со сите напади на Реал, и преку нова брза контра успеаа да поведат со 2-1 во 72. минута, стрелец на голот одново беше Бака.
’Кралевите’ не успеаа да се опорават од ваквиот шок, па сега заостануваат три бода зад лидерот Атлетико и два зад Барселона.
Диего Коста одново беше херојот на Висенте Калдерон, напаѓачот го постигна единстваениот погодок на средбата против Гранада вреден три бода и прво место во Примера.
Барселона пред своите фанови стигна до рутинска победа од 3-0 над Селта.
Нејмар го отвори резултатот на стартот од средбата а по половина час игра Меси зголеми на 2-0. Бразилецот го реши натпреварот со својот втор гол во 67. минута.
Лоша вест за ’Каталонците’ е повредата на Виктор Валдес, голманот ги оштети лигаментите на коленото, за него заврши сезоната а тој нема да настапи ниту на Светското Првенство.
Извор: 24FUDBAL.com.mk
