Англија | Поранешниот менаџер на Манчестер Јунајтед, Сер Алекс Фергусон вели дека инспирацијата за успехот ја добил од учителката во основно училиште, која го тепала со каиш...
72 годишниот Шкот, кој летоска се повлече од кормилото на ’Црвените Ѓаволи’, во раговор со медиумите од ’Островото’ вели дека безмилосната Елизабет Томсон била инспирација за успехот што го постигнал.
Учителката од основното училиште, која често го тепала со каиш по дланките, му дала мотив и одлучност да биде успешен.
Сер Алекс Фергусон стапил во контакт со својата учителка кога играл за Ренџерс, и останале во контакт се до нејзината смрт.
„Кога таа почина, не можев да отидам на погребот бидејќи Манчестер Јунајтед играше во странство”.
„Неколку месеци подоцна добив пакет. Таа ми го остави во наследство каишот”.
„Ми го испрати нејзиниот внук заедно со писмо во кое пишуваше, ’Ти знаеш повеќе за овој каиш од било кој друг’”.
„Каишот е во мојата работна соба. Моите внуци се преплашени од него”.
„Шест удари од него и вие сте во агонија. Се обидував да ги тргнам дланките”.
„Но тоа беше казната што ја добивате доколку ги преминете границите. Во мојот случај тоа беше вообичаено поради тепачки на игралиштето”.
„Госпоѓата Томсон се трудеше да ве натере да сакате да бидете најдобри што можете”.
„Ги направи подобри сите оние со кои беше во контакт. Постојано бараше предизвици“.
„Да, мислам дека дел од мене доаѓа од нејзе. Таа одлучност и големиот мотив. Нејзиниот став никогаш да не се предава“.
Сер Алекс Фергусон беше познат по строгата дисциплина што ја бараше од своите играчи, многу фудбалери на Манчестер Јунајтед го имаат искусено легендарниот ’фен’ третман кога не се однесуваат онака како што треба.
Извор: 24FUDBAL.com.mk
