Лига на Шампиони | Роберто Манчини вели дека Жозе Мурињо на ’Нероаѕурите’ им донел триумф во најелитното европско натпреварување благодарејќи на тимот што тој го креирал...



Стратегот четири години го предводеше Интер, му донесе три Скудета и два трофеи од Купот на Италија, но поради лошите резултати во Лигата на Шампионите, доби отказ во 2008.
 
На негово место беше назначен Жозе Мурињо, кој во својата втора година на Џузепе Меаца стигна до историската тројна круна и триумф во Серија А, Лигата на Шампионите и Купот на Италија.
 
Во пресрет на пресметката помеѓу Галатасарај и Челзи, Роберто Манчини ја подгрева атмосферата и вели дека ’Специјалниот’ на Интер му донел успех во најелитното евроско натпреварување благодарејќи на тимот што тој го креирал.
 
„Мурињо за кратко време ја освои Лигата на Шампионите бидејќи превзеде добар тим” – рече Манчини во интервју за Evening Standard.
 
„Тој превзеде тим што јас го креирав”.
 
„Тим што имаше силен менталитет. Кога пристигнав во Интер, тие играа многу лош фудбал и јас го променив тоа”.
 
„Да се триумфира во Лигата на Шампионите, потребна ви е малку среќа”.
 
„Лигата на Шампионите е тешко натпреварување, но во исто време и чудно”.
 
„Чудно бидејќи можете да бидете најдобри во групата во октомври, ноември и декември, но се да се промени во февруари (кога започнува нок-аут фазата)”.
 
Останува да се види дали Жозе Мурињо ќе одговори на ваквата ситна провокација, двајцата тренери се препукуваа преку медиумите и минатата сезона.
 
По средбата на Етихад Стадионот помеѓу Манчестер Сити и Реал Мадрид, ’Специјалниот’ изјави дека веднаш ќе добиел отказ доколку му се случело сценариот на Роберто Манчини и ја завршел авантурата во Лигата на Шампионите уште во групната фаза.
 
Италијанецот потоа возврати дека Жозе Мурињо бил љубоморен на неговата позиција во Манчестер Сити.

Извор: 24FUDBAL.com.mk