МЕНИ

Шпанија | Претседателот на ’Каталонците’, Хосеп Мариа Бартомеу вели дека тие не сторили ништо погрешно при трансферот на Нејмар и убеден е дека ќе ја докажат невиноста пред судот...

Минатиот месец, Сандро Росел се повлече од претседателската функција поради контроверзиите кои настанаа со трансферот на Нејмар на Камп Ноу, и судскиот процес против него.

Но сагата не застана таму, вчера судот на барање на обвинителството покрена истрага со која ’Каталонците’ се товарат за даночна измама.

За обвинителството и судот спорни се 40 милиони евра што Барселона ги исплатила на компанијата N&N, која е во сопственост на родителите на Нејмар.

Обвинителството верува дека Барселона за оваа сума требала да плати данок во висина од 9,1 милиони евра, нешто што клубот од Камп Ноу не го сторил.

Претседателот на Барселона, Хосеп Мариа Бартомеу не е загрижен од ваквиот развој на настаните и убеден е дека тие ќе ја докажат својата невиност пред судот.

„Убедени сме дека договорот со Нејмар и Сантос е комлетно легален” – рече Бартомеу.

„Бевме советувани од надворешни адвокати и даночни експерти. Клубот, семејството на Нејмар и Сантос ги сторија сите работи на најдобар можен начин”.

„Се е комлетно легално. Релаксирани сме. Ние сме еден од клубовите кои на време си ги плаќаат даноците, и од оваа гледна точка, Барселона е пример”.

„Доколку одново ни се даде шанса да го ангажираме Нејмар, ќе ги сториме истите работи”.

„Целта беше да се стигне до играч, кој е еден во генерација, и тој да игра со најдобриот во светот, Лео Меси”.

„Кога ќе дојде време, на судијата ќе му објасниме дека се е легално и во законски рамки”.

„Нашите партнери исто така не треба да се грижат, ќе ја браниме честа на клубот. Не сторивме ништо погрешно. Се е чисто, фер и транспарентно”.