Германија | Пеп Гвардиола вели дека сите во Баерн Минхен сака Тони Крос да стави потпис на нов договор, и го пофали играчот за перформансите против Арсенал...
24 годишниот репрезентативец на Германија е обврзан кон ’Баварците’ до 2015, и неодамна ја одби последната понуда за продолжување на договорот.
Токму затоа неговата иднина на Алианц Арена беше ставена под знак прашалник, а во зимскиот преоден рок Манчестер Јунајтед се обиде да стигне до услугите на Тони Крос.
Обидот на шампионот на Англија беше неуспешен, но се најавува дека ’Црвените Ѓаволи’ ќе достават нова понуда летоска.
Дејвид Мојс вчера беше во ложата на Емирати Стадионот и ја следеше средбата помеѓу Арсенал и Баерн Минхен во осмина-финалето од Лигата на Шампионите.
Тони Крос прикажа одлична партија, го отвори резултатот со прекрасен удар од далечина и беше главен играч во средниот ред на ’Баварците’.
По крајот на натпреварот, Пеп Гвардиола ја пофали играта на Тони Крос и посочи дека сите во клубот сакаат тој да остане.
„Тони одигра на многу, многу виско ниво. Тоа беа перформанси на нивото на Лигата на Шампионите“ – рече тренерот на Баерн.
„Сите ние сакаме Крос да стави потпис на нов договор, а и самиот тој го посакува истото”.
„Оптимист сум. Сите во клубот го посакуваат тоа”.
Извор: 24FUDBAL.com.mk
