МЕНИ

Шпанија | По 23 одиграни кола во шпанската Примера, Барселона, Реал и Атлетико Мадрид имаат ист број бодови откако вечерва Каталонците со 4-1 победија на гостувањето кај Севиља...

Како ретко кога изедначена битка за титулата во Примера, Барса, Реал и Атлетико имаат ист број на бодови по 23 одиграни натпревари оваа сезона.

Барселона го искористи киксот на Атлетико Мадрид кој загуби од Алмерија и со победа над Севиља се израмни на врвот.

Каталонците победија со 4-1, но резултатот не беше одраз на случувањата на теренот, Севиља имаше неколку одлични шанси за погодок и не заслужи толку убедлив пораз, но Барса беше поефикасна и на крајот се радуваше на победата.

Лео Меси им се врати на погодоците, Аргентинецот два пати ја тресеше мрежата на Бастос.

Домаќините дојдоа во водство во 15. минута со гол на Морено, на патот до голот топката го погоди Бартра и заврши зад грбот на Валдес.

Во 34. минута Барса го изедначи резултатот со гол на Санчез, при постигнувањето на погодокот имаше јасна офсајд позиција, но судиите не го видоа тоа.

Пред крајот на првото полувреме Меси погоди за комплетен пресврт и водство на Барселона од 2-1, а по десет минути игра во вториот дел повторно реализираше за предност и од 3-1.

Сите дилеми околу победникот ги реши Фабрегас во 88. минута со убав лоб удар.

Реал Мадрид синоќа со 4-2 го победи Виљареал и ја продолжи добрата форма од последните кола со која ја анулираше предноста на Атлетико Мадрид и Барселона.

Јорганџиите направија голем кикс со поразот на гостувањето кај Алмерија и со најслаба гол разлика од водечките екипи се најдоа на третата позиција.