Шпанија | Со три бода предност пред Барселона и Реал, Атлетико Мадрид е новиот лидер во Примера...



Атлетико Мадрид го искористи киксот на Барселона и се одлепи на врвот на табелата во шпанската Примера.
 
Јорганџиите синоќа одиграа уште еден убедлив натпревар и го совладаа Реал Сосиедад со 4-0.
 
Давид Виља, Диего Коста, Миранда и Диего беа стрелци на головите за тимот на Диего Симеоне.
 
Интересно, со многу тензија и борбеност беше на Сан Мамеш каде што Атлетик Билбао и Реал Мадрид одиграа нерешено 1-1, Баскијците останаа без пораз на домашен терен оваа сезона.
 
По мирното прво полувреме, следуваше бура во вториот дел.
 
Најпрво во 66. минута Реал Мадрид поведе со гол на Хесе по асистенција од Кристијано Роналдо.
 
А во 74. минута стапи џокерот на Билбао, Ибаи Гомез веднаш по влегувањето постигна прекрасен погодок од далечина за 1-1.
 
Само две минути подоцна Кристијано Роналдо заработи директен црвен картон поради намерно удирање на противнички играч без топка.
 
До крајот на натпреварот и двете екипи играа на победа, но натпреварот остана со резултатот 1-1.
 
Во другите вчерашни натпревари, Бетис со 2-0 го победи Еспањол, Елче со 1-0 славеше над Алмерија.
 
По 22 одиграни кола, Атлетико Мадрид е прв со 57 бода, по него следуваат Барселона и Реал Мадрид со по 54, во местата кои водат во Лигата на Шампионите се наоѓа и Атлетик Билбао со 43 бода, шест повеќе од Виљареал кој денеска игра против Осасуна.

Извор: 24FUDBAL.com.mk