МЕНИ

Англија | Ливерпул со убедливи 4-0 го прегази Евертон во градското дерби, Арсенал одигра нерешено на гостувањето кај Саутемптон, Манчестер Јунајтед со 2-0 го доби Кардиф...

Ливерпул доминира во Мерсисајд, Црвените со фантастични 4-0 го победија градскиот ривал Евертон.

Серијата погодоци започна во 21. минута кога Џерард погоди со глава за прва радост на Енфилд и водство на Ливерпул од 1-0.

Потоа Стариџ стапи на сцена и реализираше два пати за убедлива предност од 3-0, сите дилеми околу победникот беа решени.

Особено интересен беше вториот гол на Стариџ кој по убава асистенција од Коло Туре, го лобуваше Тим Хауард.

По пет минути игра во второто полувреме, Луис Суарез ги постави конечните 4-0.

Во 54. минута Ливерпул пропушти фантастична шанса за победа од 5-0, која ќе беше и највисока во Мерсисајд дуелите, но Стариџ не реализираше удар од белата точка.

Арсенал одигра 2-2 кај одличниот оваа сезона Саутемптон, па многу е реално дека Топџиите утре ќе бидат симнати од врвот во Премиер лигата.

Саутемптон поведе со гол на Фонте во 21. минута, но на почетокот од вториот дел Арсенал направи комплетен пресврт со голови на Жиру и Казорла.

Во 54. минута капитенот на домаќините, Лалана постигна погодок за конечни 2-2.

Арсенал натпреварот го заврши со фудбалер помалку, бидејќи Фламини доби црвен картон во 80. минута поради старт со две нозе.

Манчестер Јунајтед со 2-0 го доби Кардиф, Оле Гунер Солскјер се врати на Олд Трафорд, Хуан Мата дебитираше за Црвените Ѓаволи.

Солскјер нема да се сеќава по добро на својот прв настап на Олд Трафорд како тренер на противничкиот тим, Кардиф ја продолжи серијата порази.

Хуан Мата го имаше својот прв настап за Манчестер Јунајтед, беше стартер и одигра 85 минути од натпреварот.

Робин ван Перси и Ешли Јанг беа стрелци на погодоците за Јунајтед.

Во останатите вечерашни натпревари Свонси го победи Фулам со 2-0, Кристал Палас со 1-0 славеше над Хал, немаше погодоци на дуелот помеѓу Норич и Њукасл.