Англија | Немања Матиќ вели дека го одиграл последниот натпревар во дресот на Бенфика, фудбалерот од средниот ред сака да се врати на Стемфорд Бриџ...



25 годишниот репрезентативец на Србија се пресели во Бенфика во 2011, како дел од трансферот на Давид Луиз во Челзи.
 
Немања Матиќ одлично се снајде на Естадио Да Луж, и се промовираше како еден од подобрите фудбалери од средниот ред на ’Стариот Континент’.
 
За неговите услуги интерес пројавија голем број клубови, а во последно време силно се говори дека играчот ќе се врати на Стемфорд Бриџ.
 
Извештаите велат дека Челзи и Бенфика постигнале договор за трансфер вреден помеѓу 20 и 25 милиони фунти, па Немања Матиќ оваа недела треба да пристигне во Лондон на медицински прегледи.
 
Во интервју за A Bola, самиот фудбалер признава дека е пред трансфер во Челзи, Матиќ вели дека триумфот над Порто изминатиов викенд бил последен натпревар за него во дресот на Бенфика.
 
„Дуелот со Порто беше мојот последен натпревар за Бенфика” – рече репрезентативецот на Србија.
 
„Сакам да им се заблагодарам на сите во клубот и на навивачите. Бенфика секогаш ќе биде во моето срце”.
 
„Играв тука две ипол години, го давав максимумот на секој тренинг, на секој натпревар, и сега е право време да заминам”.
 
„Сакам да станам подобар играч, сакам да се преселам во подобро првенство и сакам да играм за Челзи, клуб кој исто така го обожавам”.
 
„Исто така сакам да му се заблагодарам на претседателот на Бенфика, тој стори се што можеше за да ме задржи, но јас сакав да заминам”.
 
„Инсистирав на заминување бидејќи ова е правиот момент”.

Извор: 24FUDBAL.com.mk