Италија | Милан доживеа нов удар, овој пат Росоњерите загубија на гостувањето кај Сасуоло со 4-3, сите погодоци за домаќините беа дело на младиот Берарди...
Кризата на Милан нема крај, столчето на Алегри силно се тресе и очекувањата се дека уште во текот на денешниот ден тој ќе добие отказ.
Милан одлично го започна натпреварот против Сасуоло, по само 13 минути игра Росоњерите поведоа со 2-0 со погодоците на Робињо и Балотели.
Но потоа следуваше блесок на Берарди кој погоди четири пати и донесе водство од 4-2 за Сасуоло.
Милан се врати во игра со гол на Монтоливо во 86. минута, преку Пацини имаше шанси и за нешто повеќе, но на крајот доживеа нов пораз.
По 19 одиграни кола, Милан заостанува неверојатни 30 бода од лидерот Јувентус.
Старата Дама синоќа со 4-1 победи на гостувањето кај Каљари.
Домашниот тим поведе со гол на Пиниља, но Јувентус брзо ги консолидираше редовите и не дозволи изненадување.
Љоренте постигна два гола, по еднаш погодија Маркизио и Лихштајнер.
Убедлива победа забележа и Рома која со 4-0 ја победи Џенова.
Флоренци, Тоти, Маикон и Бенатиа беа стрелците на погодоците за Римската Волчица.
Наполи со 3-0 победи на гостувањето кај Верона.
Мертенс, Инсиње и Џемаили стрелаа прецизно, Пандев беше стартер и настапи до 67. минута.
Македонскиот интернационалец имаше две убави шанси за гол но не успеа да реализира.
Немаше голови на дуелот помеѓу Торино и Фиорентина, Аталанта со 2-1 ја победи Катанија.
Извор: 24FUDBAL.com.mk
