Англија | Арсен Венгер вели дека Арсенал во овој момент не размислува за ангажман на Димитар Бербатов од Фулам...



Моменталниот лидер во Премиер лигата е малку ’тенок’ во нападот, Оливие Жиру е единствениот квалитетен шпиц, па се говори дека ’Топџиите’ ќе се обидат да го засилат токму овој дел од тимот во зимскиот преоден рок.
 
Медиумите од ’Островото’ вчера објавија дека Арсенал би можел да го ангажира Димитар Бербатов од Фулам.
 
Искусниот напаѓач е под договор до крајот на сезоната, па се говореше дека понуда вредна помеѓу 2 и 3 милиони фунти ќе биде доволна за Бугаринот да замине од Кревин Котиџ.
 
Сепак, Арсен Венгер ги демантира ваквите стории, менаџерот на Арсенал вели дека тие во моментов не размислуваат за ангажман на поранешниот играч на Тотенхем и Манчестер Јунајтед.
 
Зборувајќи на денешната прес конференција, Французинот рече: „Не размислуваме на Бербатов во овој момент”.
 
„Не сме стапиле во контакт со никого. Само ги разгледуваме нашите опции. Морам да признам дека тие се прилично ограничени”.
 
Арсен Венгер исто така потврди дека Оливие Жиру се опоравил од повредата на скочниот зглоб, но поради настинка е под голем знак прашалник за дуелот со Тотенхем во ФА Купот и има за 10% шанси за настап.
 
Никлас Бендтнер и Јаја Саного не се во комбинација поради повреда, па Лукас Подолски или Тео Волкот ќе го предводат нападот на Арсенал во дербито на северен Лондон во сабота.

Извор: 24FUDBAL.com.mk