МЕНИ

Италија | Поранешниот предводник на Милан, Фабио Капело верува дека Кларенс Сидорф не е подготвен за превземање на кормилото на ’Росоњерите’...

Подолго време се говори дека сопственикот на ’Росоњерите’, Силвио Берлускони сака да го именува Кларенс Сидорф за нот тренер на тимот од Сан Сиро.

Шпекулациите на медиумите од Италија велат дека Холанѓанецот веќе има пред-договор со Милан, и по крајот на сезоната ќе го наследи Масимо Алегри.

Поранешниот предводник на ’Миланезите’, Фабио Капело не се сомнева дека Кларенс Сидорф има квалитет, но верува дека е прерано фудбалерот од средниот ред на Ботафого да седне на жешкото столче на Сан Сиро.

„Кларенс е способен човек, и имам одличен однос со него” – рече селекторот на Русија за Gazzetta dello Sport.

„Јас бев тој што го советуваше да оди и да игра во Бразил, кога тој размислуваше за преселба во Русија и ОАЕ пред една година”.

„Очигледно ова искуство му е од голема корист, но веднаш да ја превземе одгворноста што ја носи тренерската позиција во Милан е нешто сосема друго”.

Капело исто така вели дека Масимо Алегри добро си ја врши работата и не заслужува да биде критикуван.

„Јувентус и Рома се на врвот бидејќи вложија многу во изминатите неколку години”.

„Милан не инвестираше многу. Мислам дека Алегри добро си ја врши работата, и не заслужува да биде толку многу критикуван”.

„Главниот проблем е падот што го бележи првенството на Италија“.

Запрашан кој ќе го освои Скудетото, тој одговори: „’Бјанконерите’ не би требало да имаат поголеми проблеми, и покрај тоа што Рома има извонредна сезона, а и Наполи заслужено е во трката”