Англија | Медиумите од ’Островото’ пренесуваат дека Маруан Фелаини ќе биде надвор од терените околу два месеци...



Репрезентативецот на Белгија подолго време се мачи со повреда на зглобот на раката, заработена во октомври на дуелот со Шахтјор во Лигата на Шампионите.
 
’Црвените Ѓаволи’ се обидуваа да пронајдат соодветен момент за играчот да замине под ’нож’, и со оглед на тоа дека Маруан Фелаини има и повреда на грбот, лекарите на клубот дале зелено светло за операција.
 
Медиумите од ’Островото’ пренесуваат дека изминатиов викенд врз играчот успешно бил извршен оперативен зафат.
 
Се очекува Маруан Фелаини да паузира помеѓу шест и осум недели, целта е фудбалерот од средниот ред да биде фит за вториот дел од сезоната и осмина-финалната пресметка од Лигата на Шампионите против Олимпијакос.
 
Фелаини пристигна на Олд Трафорд во последниот ден од летниот преоден рок, но во дресот на актуелниот шампион на Англија игра под своите можности и се мачи со формата.
 
Има само 11 настапи во сите натпреварувања зад своето име и сеуште нема постигнато гол.

Извор: 24FUDBAL.com.mk