МЕНИ

Шпанија | Икер Касиљас вели дека е задоволен во Реал Мадрид и не размислува за заминување од Сантијаго Бернабеу...

Минатата сезона, голманот го загуби првотимскиот статус под водство на Жозе Мурињо, а тоа не се промени ниту по пристигнувањето на Карло Анчелоти.

Италијанецот сака да го задржи искусниот голман, па направи компромис и одлучи Диего Лопез да брани на средбите од Примера, а Икер Касиљас да ја чува мрежата на ’Кралевите’ на натпреварите од Лигата на Шампионите.

Медиумите шпекулираат дека Икер Касиљас не е задоволен од ваквата ситуација и ја разгледува можноста да го напушти Реал Мадрид.

Оваа недела се појавија стории кои велеа дека Арсенал и Манчестер Сити се во контакт со репрезентативецот на Шпанија, но самиот Касиљас вели дека не размислува за заминување од Мадрид.

Во емисијата El Hormiguero на Antena 3, тој рече: „Реал е мојата сегашност. Задоволен сум што сум во Мадрид. За пет или шест години ќе видиме што ќе се случи”.

„Има многу шпекулации за мојата иднина. Речиси секој ден се појавуваат гласини и мислам дека тоа е нормално”.

„Но јас припаѓам на Реал Мадрид, тука сум долги години и сакам да останам тука”.

„Мојата одлука во овој момент е да останам во Реал Мадрид. Сакам да ја освојам десетата титула во Лигата на Шампионите, и уште многу трофеи од купот и првенството”.