МЕНИ

Италија | Џенаро Гатузо е навреден од обвинувањата дека местел натпревари, поранешниот играч на Милан вети дека ќе си го обели образот...

Обвинителството од Кремона денеска спроведе нова акција против нелегалното обложување во Калчото.

Како дел од акцијата, беше претресен домот на Џенаро Гатузо, поранешниот играч на Милан.

Тој е под сомнеж дека влијаел на исходот на неколку натпревари, бидејќи бил во комуникација со Франческо Бацани, едно од четворицата лица кои беа приведени во раните утрински часови.

Во разговор со Sportmediaset, Џенаро Гатузо вели дека е невин и вети дека ќе си го обели образот.

„Гневен сум и навреден” – реча Гатузо. „Ќе ги расчистам сите недоразбирања”.

„Не сакам да имам дамка во мојата кариера. Никогаш во мојот живот не сум се обложувал”.

На оваа тема се огласи и адвокатот на Џенаро Гатузо, Андреа Д’Амико.

„Се слушнав со Рино, тој беше шокиран. Во овој момент не можеме да даваме коментари“– рече Д’Амико.

„Рино не беше во својот дом, сега се враќа. Адвокатите веќе се во контакт со обвинителството. Важно е во овој момент да не се извлекуваат никакви заклучоци и да почекаме да видиме зошто се појавија овие имиња”.

„Тоа што е под истрага не мора да значи ништо. Можно е да се работи само за погрешни обвинувања”.

„Понекогаш кога сте познат играч, лесно е вашето име да се појави и да бидете цел”.

„Ќе почекаме и ќе видиме како ќе се развива ситуацијата”.