Англија | Арсен Венгер уште еднаш потврди дека е фан на играта на Луис Суарез, менаџерот на Арсенал вели дека секој сонува за играч како Уругваецот...
Напаѓачот на Ливерпул беше топ трансфер цел на ’Топџиите’ во летниот преоден рок.
Арсенал достави две понуди за Луис Суарез но ’Црвените’ не сакаа да слушнат за продажба на својата ѕвезда.
Репрезентативецот на Уругвај вчера уште еднаш ја покажа својата класа, и беше главен играч на Ливерпул во убедливата победа од 5-0 на гостувањето кај Тотенхем.
По крајот на средбата на Вајт Харт Лејн, зборувајќи за Telefoot, каде Арсен Венгер работи како стручен коментатор, менаџерот на Арсенал уште еднаш изрази восхитеност од перформансите на Луис Суарез.
„Мислам дека секој дефанзивец во Англија мрази да игра против него” – рече Французинот. „Луис има силен, провокативен карактер”.
„Од информациите до кој јас дојдов, се чини дека тој е лесна личност за работа при секојдневните обврски”.
„Исто така тој е пристоен, обожава да тренира, се однесува како ангел. Но се претвара во демон кога ќе истрча на теренот”.
„Сите менаџери сонуваат за играч како него”.
И покрај тоа што ги пропушти првите пет кола поради суспензија, Луис Суарез е прв стрелец во Премиер лигата со 17 погодоци на 11 средби.
На дуелот со Тотенхем, Уругваецот ја доби капитенската лента по повредите на Стивен Џерард и Даниел Агер.
Извор: 24FUDBAL.com.mk
