Англија | По вчерашниот дебакал на домашен терен во дуелот со Ливерпул, ’Спарси’ решија да се разделат со тренерот Андре Вилаш Боаш...



Медиумите од ’Острвото’ неколку недели говореа дека иднината на стратегот на Вајт Харт Лејн е под знак прашалник по слабите перформанси, а вчерашниот убедлив пораз од 5-0 на дуелот со Ливерпул ја прели чашата.
 
„Тотенхем може да соопшти дека е постигнат договор со Андре Вилаш Боаш за прекин на соработката” – гласеше известувањето на ’Спарси’.
 
„Одлуката беше на взаемна согласност и во најдобар интерес на сите страни”.
 
„Му посакуваме на Андре се најдобро во иднина”.
 
Португалецот го превзеде кормилото на Тотенхем во јули 2012 и забележа импресивни резултати во првата година на Вајт Харт Лејн, ’Спарси’ сезоната ја завршија со 72 бода и за малку не успеаа да обезбедат место во Лигата на Шампионите.
 
Пред почетокот на оваа сезона, Андре Вилаш Боаш направи голема реконструкција на тимот откако главната ѕвезда, Герет Бејл побара да замине во Реал Мадрид.
 
Беа потрошени повеќе од 100 милиони фунти на засилувања во летниот преоден рок, но новите играчи не ги прикажуваат очекуваните резултати а ’Спарси’ играат под очекувањата, па лидерите на клубот решија дека е време за промени.

Извор: 24FUDBAL.com.mk